Uşaqlar üçün "Sevinc payı" layihəsi davam etdirilir

2025-ci ilin əvvəlindən etibarən Azərbaycan Uşaq Fondu xüsusi həssaslıqla «Sevinc Payı» adlı sosial layihəni həyata keçirir.

Layihənin məqsədi valideyn qayğısından məhrum olan uşaqlara sevinc dolu anlar, təbəssüm və bayram əhval-ruhiyyəsi bəxş etməkdir. Hər ayın sonuncu bazar ertəsi internat məktəblərində, uşaq evlərində və sığınacaqlarda yaşayan balacalar üçün xeyirxahlıq qapıları açılır.

Layihə çərçivəsində uşaqlar maraqlı filmlərə baxır, xüsusi hazırlanan menyu və qonaqpərvərliklə qarşılanırlar. Bu anlar onlar üçün sadəcə əyləncə deyil — həm də diqqət və qayğını hiss etmək imkanıdır.

25 avqust tarixində Bakıda keçirilən tədbir isə xüsusilə “Mələklərimin Arzuları” İB-nin himayəsində olan əlilliyi olan uşaqlara həsr olunmuşdu. Onların səmimi təbəssümləri, parlaq gözləri və xoşbəxt qəhqəhələri belə anların nə qədər dəyərli olduğunu göstərirdi. Bu təşəbbüs uşaqlara özlərini qiymətli, sevilən və xatırlanan hiss etməyə şərait yaradır.

Azərbaycan Uşaq Fondu öz ali missiyasını davam etdirir — xüsusilə qayğıya ehtiyacı olanların yanında olmaq. «Sevinc Payı» layihəsi isə xeyirxahlığın və ümidin rəmzinə çevrilib.