Uşaqlar Bayır Şəhərin gözəlliklərini rəsmlə və şeirlə təqdim etdilər

3 sentyabr tarixində Azərbaycan Uşaq Fondu, «Gənc şairlər» ədəbi layihəsi və Cult Baku Clubun birgə təşkilatçılığı ilə Bayır Şəhərin tarixi dəyərinin qorunmasına həsr olunmuş möhtəşəm bir tədbir keçirildi.

Tədbir zamanı uşaqlar Bayır Şəhərin unudulmaz gözəlliklərini əks etdirən rəsm əsərlərini böyük sevgi ilə təqdim etdilər.

«Gənc şairlər» layihəsinin iştirakçıları Azərbaycan Rəssamlar İttifaqının üzvü, Bakı İncəsənət Mərkəzinin direktoru Rafaəl Gülməmmədlinin maraqlı və maarifləndirici mühazirəsini dinlədilər. Rəssam öz çıxışında Bayır Şəhərin qədim binaları sayəsində qorunan xüsusi koloritindən danışaraq, bu memarlıq incilərinin gələcək nəsillərə çatdırılmasının mühüm əhəmiyyətini vurğuladı.

Sonda isə uşaqlar sevimli Bakı şəhərimizin füsunkar gözəlliklərinə həsr etdikləri şeirləri səsləndirərək tədbirə xüsusi bir ruhi ahəng qatdılar. Tədbirin sonunda balaca iştirakçılara yadda qalan hədiyyələr – kitablar təqdim olundu. Bu hədiyyələr uşaqlarda həm oxu sevgisini artırmaq, həm də onların ədəbi dünyasını daha da zənginləşdirmək məqsədi daşıyırdı.